Filipino designer Patrick Isorena laughs off “Pasan Ko Ang Daigdig” memes about “Woman On The Moon” NatCos of Miss USA R’Bonney Gabriel

Ang “Woman On The Moon” national costume ni Miss USA R’Bonney Gabriel ang isa sa nakatanggap ng pinakamaraming atensiyon at papuri sa preliminary competition ng 71st Miss Universe.

Hinuhulaan ding malaki ang tsansa nitong manalo bilang Best in National Costume sa grand coronation ng Miss Universe 2022 na gaganapin sa New Orleans, Louisiana, Sabado ng gabi, January 14, 2023 (Linggo ng umaga, January 15, 2023, sa Pilipinas).

Ang national costume ng Filipino-American na si R’Bonney ay nilikha ng Filipino fashion designer na si Patrick Isorena.

Hindi lamang hinahangaan ang national costume ni Gabriel dahil may mga lumalabas ding memes tungkol sa kanyang mala-Pasan Ko Ang Daigdig na kasuotan.

Pero imbes na maapektuhan, natatawa si Patrick sa mga reaksiyon na nakikita niya sa social media.

“Well, that’s true. Literally, yung design is pasan niya talaga yung moon,” sabi ni Patrick nang eksklusibo siyang makausap ng Philippine Entertainment Portal (PEP.ph), Biyernes ng gabi, January 13.

“I actually appreciate the memes, ang funny din naman kasi!

“But we wanted a showstopper, so ayun, pasan na niya yung daigdig! Ay, buwan pala!

“R’Bonney proved that no matter what the challenge is, kayang- kaya niya.

“And to those na naka-appreciate ng aking creation, salamat po! Pinoy pride po ang bitbit natin diyan!”

Ano ang reaksiyon niya sa opinyon ng mga tao na ang “Woman On The Moon” ang karapat-dapat magwaging Best in National Costume sa 71st Miss Universe?

“Masaya! Sobrang saya kung magkakaganoon nga po, but just being there in the Miss Universe stage together with some Filipino designers, dun pa lang po panalo na kami,” sagot ni Patrick.

Maituturing na bilang Philippine brand si Patrick dahil kinikilala na sa buong mundo ang kanyang husay bilang fashion designer kaya maligayang-maligaya siya.

Saad niya, “I’m overwhelmed. Mixed emotions po.

“I think it’s about time to show the world… the universe rather, that we Filipinos can be as great as other artists around the world.

“And if I am one of the reasons why, I am glad and will continue the legacy that we have started.”

PHOTO: Courtesy of Patrick Isorena

WHO IS PATRICK ISORENA?

Isinilang si Patrick sa Pakil, Laguna, noong 1985 pero lumaki siya sa Quezon City.

Nagtapos siya ng kursong Bachelor of Secondary Education Major in Speech and Theater Arts sa Philippine Normal University.

Naniniwala si Patrick na minana nito ang pagiging artistic at mahusay na designer mula sa kanyang pamilya na pawang mga artist ding kagaya niya.

“I think got my talent from my parents and the Isorena-Salem clan.

“Almost all of them are artists in their own way — carpenter, handicrafts, entrepreneurs, teachers, at seamstress.

“Siguro, growing up, napagsama-sama ko yung mga nakikita ko sa kanila.”

Dahil sa mga papuri tungkol sa “Woman On The Moon” creation ni Patrick, masayang-masaya ang pamilya niya lalo na ang kanyang nanay na si Emma Isorena na hindi napigilang mapaluha.

“Awwww, my mom, she cried. Actually, buong angkan ko na yata and my partner, Shaun Lim, kasama ko siya sa whole journey na ito.”

PHOTO: Courtesy of Patrick Isorena

Patrick with his mother

MATERIALS USED IN R’BONNEY’S NATIONAL COSTUME

Ayon kay Patrick, fibers ang ginamit niyang materyal sa paggawa ng hand-painted na buwan para sa national costume ni R’Bonney na may bigat na labindalawa (12) hanggang labinlimang (15) kilo.

Ginawa ni Patrick sa loob ng isang buwan ang pinag-uusapang national costume ni R’Bonney, minus the December holidays.

Sinimulan niya ang kanyang proyekto noong November 2022 at natapos ito noong bisperas ng Pasko.

Umuwi ng Pilipinas ang mga magulang ni R’Bonney dahil personal nilang kinuha mula kay Patrick ang national costume na gagamitin ng kanilang anak sa 71st Miss Universe.

PHOTO: Courtesy of Patrick Isorena

Patrick with R’Bonney Gabriel’s parents

Kuwento ni Patrick, “Dapat ipadadala sa Amerika ang national costume via an international courier but it will cost US$5,000.

“So R’Bonney asked her parents to come here in the Philippines to get her national costume and gowns, a total of three big boxes!

“One for the moon, one for the stars, and one for the outfit and accessories.

“They flew via United Airlines, and I think the cost for oversized boxes is additional US$ 200, so make that times two.”