John Ernest Tanting wins Mister Beauté International in Turkiye

Patuloy na humahataw sa mga male international pageant ang mga kinatawan ng Pilipinas.

Si John Ernest Tanting ng Cebu ang nanalo sa inaugural edition ng Miss and Mister Beauté International Pageant, na idinaos noong Sabado, November 26, 2022, sa Akbun Hotel sa Istanbul, Turkiye.

Si John Ernest ang appointed candidate sa first Miss and Mister Beauté International dahil kabilang siya sa Top 10 finalists sa coronation night ng first Mister International Philippines, na ginanap sa Okada Manila noong June 27, 2022.

Hindi nagkamali ang Mister International Philippines Organization sa desisyon na ipadala si John Ernest sa Turkiye dahil siya ang nagwagi sa male division ng Miss and Mister Beauté International at tumanggap ng special award para sa Best Costume.

Si John Ernest ang ika-apat na Pilipino na nagtagumpay sa international pageant, dahil nauna nang nanalo si Jovy Bequillo sa first Man Hot Star International na naganap sa Bangkok, Thailand noong Biyernes, November 25.

Sumunod kay Jovy si Kristzan Karlo Delos Santos, ang first runner-up sa fifth Mister Grand International na nangyari rin noong Biyernes sa Trinidad & Tobago.

Fourth runner-up naman sa 14th Mister International si Myron Jude Ordillano sa finale show na ginanap sa New Frontier Theater noong October 30, 2022.